കേരള ബ്ലാസ്റ്റേഴ്സ് ആരാധകർക്ക് വീണ്ടുമൊരു കിടിലൻ വാർത്ത. മഞ്ഞപ്പടയുടെ സ്വന്തം കൊപ്പലാശാനെ തിരികെയെത്തിക്കാൻ ബ്ലാസ്റ്റേഴ്സ് ശ്രമിക്കുന്നുണ്ടെന്നാണ് ഒടുവിൽ പുറത്ത് വരുന്ന വിവരങ്ങൾ. ഏറെക്കാലമായി മഞ്ഞപ്പട കാത്തിരുന്നതായിരുന്നു കൊപ്പലാശാൻ എന്ന മലയാളികളുടെ സ്റ്റീവ് കൊപ്പലിന്റെ മടങ്ങിവരവ്. മഞ്ഞപ്പടയുടെ പ്രിയ പരിശീലകനായ കോപ്പൽ കഴിഞ്ഞ സീസണിന് മുൻപ് കേരള ബ്ലാസ്റ്റേഴ്സിൽ തിരിച്ചെത്തുമെന്നായിരുന്നു ആരാധകരുടെ പ്രതീക്ഷ.
എന്നാൽ റെനെ മുളൻസ്റ്റീനെ കേരള ബ്ലാസ്റ്റേഴ്സിന്റെ പരിശീലകനായി മാനേജ്മെന്റ് കൊണ്ട് വരികയായിരുന്നു. സീസണിന്റെ മധ്യത്തോടെ റെനെ മഞ്ഞപ്പട വിട്ടു പോവുകയും ചെയ്തു. തുടർന്നാണ് താൽകാലിക പരിശീലകനായി ഡേവിഡ് ജെയിംസ് എത്തുന്നതും പിന്നീട് പരിശീലകനാവുന്നതും മോശം പ്രകടനം കാരണം സ്ഥാനമൊഴിയേണ്ടി വന്നതും.
ഡേവിഡ് ജെയിംസിന് പകരം പ്രൊഫസർ വിംഗാട വന്നെങ്കിലും ഇന്ത്യൻ സൂപ്പർ ലീഗ് ചരിത്രത്തിലെ കേരള ബ്ലാസ്റ്റേഴ്സിന്റെ ഏറ്റവും മോശം സീസണായിത് അവസാനിച്ചു. ആരാധകരുടെ പിന്തുണയും ഈ സീസണിൽ കേരള ബ്ലാസ്റ്റേഴ്സിന് നഷ്ടമായി. നഷ്ടമായ ആരാധകരെയും കളിക്കളത്തിലെ ആത്മവിശ്വാസവും തിരിച്ച് കൊണ്ടുവരാനാണ് ബ്ലാസ്റ്റേഴ്സ് മാനേജ്മെന്റ് കൊപ്പലാശാന് വേണ്ടി ശ്രമിക്കുന്നത്