ആരാധകരെ ഞെട്ടിച്ച് കൊണ്ട് വീണ്ടും കേരള ബ്ലാസ്റ്റേഴ്സ്.
ഇന്ത്യൻ സൂപ്പർ ലീഗ് ടീമുകളുടെ പേടിസ്വപ്‌നം, നോർത്ത് ഈസ്റ്റ് യുണൈറ്റഡിനായി വെടിക്കെട്ട് പ്രകടനം കാഴ്ചവെച്ച സൂപ്പർ സ്റ്റാർ ഒഗ്ബെചെ കേരള ബ്ലാസ്റ്റേഴ്സിലെത്തി. മറ്റു ഇന്ത്യൻ സൂപ്പർ ലീഗ് ടീമുകളെ തഴഞ്ഞാണ് ഓഗ്‌ബച്ചേ മഞ്ഞപ്പടയിൽ വരുന്നത്. ഇന്ത്യൻ സൂപ്പർ ലീഗ് ചരിത്രത്തിൽ ആദ്യമായി നോർത്ത് ഈസ്റ്റ് യുണൈറ്റഡിനെ പ്ലേ ഓഫിലെത്തിക്കാൻ നായകനായ ഒഗ്ബച്ചെക്ക് സാധിച്ചിരുന്നു.
കഴിഞ്ഞ സീസണിൽ നിർണായകമായ 12 ഗോളുകളാണ് ഒഗ്ബച്ചേ ഹൈലാൻഡേഴ്സിനായി അടിച്ചത്. ബ്ലാസ്റ്റേഴ്സിന്റെ നിലവിലെ പരിശീലകൻ എൽകോ ഷറ്റോറിയുടെ കീഴിൽ മികച്ച പ്രകടനം കാഴ്ച്ച വെച്ച ഒഗ്ബച്ചേ കോച്ചിന് പിന്നാലെ കൊച്ചിയിലെത്തി. പിഎസ്ജിയിലൂടെയാണ് ഈ നൈജീരിയൻ സൂപ്പർ താരം ഫുട്ബോൾ ലോകത്ത് അറിയപ്പെടുന്ന താരമായത്. സൂപ്പർ താരം ക്ലബ്ബ് വിട്ട വിവരം നോർത്ത് ഈസ്റ്റ് യുണൈറ്റഡ് സ്ഥിതികരിച്ചിരുന്നു. മഞ്ഞപ്പടയിലേക്ക് വരാൻ ആയിരുന്നു നൈജീരിയൻ താരം നോർത്ത് ഈസ്റ്റ് വിട്ടത്. ഷറ്റോരി – ഒഗ്ബചെ കൂട്ട്കെട്ട് ബ്ലാസ്റ്റേഴ്സിന് കിരിടം നേടിക്കൊടുക്കുമെന്നാണ് പ്രതീക്ഷ.