കേരള ബ്ലാസ്റ്റേഴ്സിന്റെ മധ്യനിരയെ കീഴടക്കി ആരാധകരുടെ മനസ്സിൽ ഇടം നേടിയ യുവതാരം സഹല്‍ അബ്ദുള്‍ സമദ് ബ്ലാസ്റ്റേഴ്‌സിൽ തുടരും. കേരള ബ്ലാസ്റ്റേഴ്സിന്റെ ആരാധകർ ബ്ലാസ്റ്റേഴ്സിന്റെ മെസ്യുട്ട് ഓസിൽ എന്നാണ് യുവതാരത്തെ വിശേഷിപ്പിക്കുന്നത്.
ചരിത്രത്തിലെ ഏറ്റവും മോശം സീസൺ കേരള ബ്ലാസ്റ്റേഴ്‌സ് ഏറ്റുവാങ്ങിയെങ്കിലും തകർപ്പൻ പ്രകടനമാണ് ഈ യുവതാരം കാഴ്ചവെച്ചത്. സഹലിനെ കാണാൻ വേണ്ടി മാത്രം കളി കാണുന്ന ഒരു ആരാധക വൃന്ദത്തെ സ്വന്തമാക്കാൻ അദ്ദേഹത്തിന് സാധിച്ചിട്ടുണ്ട്. വിദേശ ക്ലബ്ബുകളിൽ നിന്നുള്ള ഓഫറുകൾ വരെ ഒഴിവാക്കിയാണ് സഹൽ മഞ്ഞപ്പടയിൽ തുടരുന്നത്.
കേരള ബ്ലാസ്റ്റേഴ്സിന്റെ 18ആം നമ്പർ സഹൽ ഇനിയും അണിയുമെന്നത് ആരാധകർക്ക് ആവേശമാകും. കേരള ബ്ലാസ്റ്റേഴ്‌സിന് വേണ്ടി ഇന്ത്യൻ സൂപ്പർ ലീഗിൽ പുറത്തെടുത്ത പ്രകടനം സഹലിനെ ഇന്ത്യൻ അണ്ടർ 23 ടീമിൽ എത്തിച്ചിരുന്നു. ജർമ്മനിക്ക് ഓസിൽ എത്രത്തോളം വേണ്ടപ്പെട്ടവനായിരുന്നോ അതിലേറെ ആവശ്യമാണ് ബ്ലാസ്റ്റേഴ്‌സിന് സഹലിനെ. സഹൽ തന്റെ ക്ലബിനൊപ്പം ഉറച്ച് നിന്നത് ചില പ്രമുഖ താരങ്ങൾക്ക് ഒരു മാതൃകയാണ്.