കേരള ബ്ലാസ്റ്റേഴ്സിന്റെ സൂപ്പർ താരവും ആരാധകരുടെ കണ്ണിലുണ്ണിയുമായ കനേഡിയന്‍ സൂപ്പര്‍ താരം ഇയാന്‍ ഹ്യൂം എന്ന മഞ്ഞപ്പടയുടെ ഹ്യുമേട്ടൻ ബ്ലാസ്റ്റേഴ്സ് വിടുന്നു. ഇൻസ്റ്റഗ്രാമിലൂടെയാണ് ക്ലബ് വിടുന്ന കാര്യം ഹ്യുമേട്ടൻ സ്ഥിതികരിച്ചത്. ബ്ലാസ്റ്റേഴ്സ് ആരാധകർക്ക് നന്ദിയറിയിച്ച ഹ്യുമേട്ടൻ മാനേജ്മെന്റിന് താല്പര്യമില്ലാത്തതിനാലാണ് ഈ തീരുമാനം എടുക്കുന്നതെന്നും കുറിച്ചു. പരുക്കില്‍ നിന്ന് മുക്തനായി ബ്ലാസ്റ്റേഴ്‌സിലേക്ക് തിരിച്ചുവരാന്‍ ആഗ്രഹിച്ചിരുന്നുവെന്നും ഹ്യുമേട്ടൻ കൂട്ടിച്ചേർത്തു.
ബ്ലാസ്റ്റേഴ്സിന്റെ ഏറ്റവും മികച്ച കളിക്കാരനെന്നു ഏത് കേരള ബ്ലാസ്റ്റേഴ്സ് ആരാധകനും കണ്ണുമടച്ച് പറയുക ഹ്യൂമേട്ടൻ എന്ന് ആരാധകർ ഇഷ്ടത്തോട് വിളിക്കുന്ന ഇയാൻ ഹ്യൂംമാണ്. താരത്തെ സ്വന്തമാക്കാൻ കേരള ബ്ലാസ്റ്റേഴ്സ് മാനേജ്മെന്റിന് താല്പര്യം ഇല്ലാത്തതിനാലാണ് ഹ്യൂമേട്ടൻ ദൈവത്തിന്റെ സ്വന്തം ബ്ലാസ്റ്റേഴ്സ് വിടുന്നത്. ഹ്യൂമേട്ടന്റെ ഫേസ് ബുക്ക് പേജിൽ ബ്ലാസ്റ്റേഴ്സ് വിട്ടതായി ആദ്യം പോസ്റ്റ് വന്നു എങ്കിലും പിന്നീട് അത് നീക്കം ചെയ്യുകയായിരുന്നു. ഇത് ഹ്യൂമേട്ടൻ ക്ലബ് വിടുന്നതായുള്ള വാർത്ത ആരാധകരെ അറിയിക്കാനായി നടത്തിയതാണെന്നാണ് ബ്ലാസ്റ്റേഴ്സ് ന്യൂസ് റിപ്പോർട്ട് ചെയ്തിരുന്നു.
കഴിഞ്ഞ സീസണിന്റെ അവസാനത്തിൽ പരിക്കേറ്റ ഇയാൻ ഹ്യൂമിന് കേരള ബ്ലാസ്റ്റേഴ്സിന്റെ മുഴുവൻ മത്സരങ്ങളും കളിയ്ക്കാൻ കഴിഞ്ഞിരുന്നില്ല. ഈ കഴിഞ്ഞ സീസണിൽ കേരള ബ്ലാസ്റ്റേഴ്സിന് വേണ്ടി കളിച്ച ഹ്യൂമേട്ടൻ 13 മത്സരങ്ങളിൽ നിന്ന് 5 ഗോളും നേടിയിരുന്നു. ഇതിൽ ഡൽഹി ഡൈനാമോസിനെതിരെയുള്ള ഒരു ഹാട്രിക്കും ഉൾപ്പെടും. ഇന്ത്യൻ സൂപ്പർ ലീഗിന്റെ ആദ്യ സീസണിൽ കേരള ബ്ലാസ്റ്റേഴ്സിന്റെ കൂടെ ഉണ്ടായിരുന്ന ഇയാൻ ഹ്യൂം അന്ന് ബ്ലാസ്‌റ്റേഴ്‌സിനെ ഫൈനലിൽ എത്തിക്കുന്നതിൽ നിർണായക പങ്കു വഹിച്ചിരുന്നു.