കേരള ബ്ലാസ്റ്റേഴ്സിന്റെ മുൻ താരവും ആരാധകരുടെ കണ്ണിലുണ്ണിയുമായ കനേഡിയന്‍ സൂപ്പര്‍ താരം ഇയാന്‍ ഹ്യൂം എന്ന മഞ്ഞപ്പടയുടെ ഹ്യുമേട്ടൻ ഇനി പൂനെ സിറ്റിക്ക് വേണ്ടി ബൂട്ടണിയും. ഒരു വർഷത്തെ കരാറിലാണ് ഹ്യുമേട്ടൻ പൂനെയിൽ എത്തുന്നത്. കേരള ബ്ലാസ്റ്റേഴ്‌സ് വിട്ടത് മറ്റൊരു ഇന്ത്യൻ സൂപ്പർ ലീഗിൽ ടീമിൽ ചേരാനെന്ന വാർത്ത മുൻപ് ഹ്യൂമേട്ടൻ നിഷേധിച്ചിരുന്നു.
കഴിഞ്ഞ സീസണിന്റെ അവസാനത്തിൽ പരിക്കേറ്റ ഇയാൻ ഹ്യൂമിന് കേരള ബ്ലാസ്റ്റേഴ്സിന്റെ മുഴുവൻ മത്സരങ്ങളും കളിയ്ക്കാൻ കഴിഞ്ഞിരുന്നില്ല. ഈ കഴിഞ്ഞ സീസണിൽ കേരള ബ്ലാസ്റ്റേഴ്സിന് വേണ്ടി കളിച്ച ഹ്യൂമേട്ടൻ 13 മത്സരങ്ങളിൽ നിന്ന് 5 ഗോളും നേടിയിരുന്നു. ഇതിൽ ഡൽഹി ഡൈനാമോസിനെതിരെയുള്ള ഒരു ഹാട്രിക്കും ഉൾപ്പെടും. ഇന്ത്യൻ സൂപ്പർ ലീഗിന്റെ ആദ്യ സീസണിൽ കേരള ബ്ലാസ്റ്റേഴ്സിന്റെ കൂടെ ഉണ്ടായിരുന്ന ഇയാൻ ഹ്യൂം അന്ന് ബ്ലാസ്‌റ്റേഴ്‌സിനെ ഫൈനലിൽ എത്തിക്കുന്നതിൽ നിർണായക പങ്കു വഹിച്ചിരുന്നു.