കേരള ബ്ലാസ്റ്റേഴ്സിന്റെ സൂപ്പർ താരവും ആരാധകരുടെ കണ്ണിലുണ്ണിയുമായ കനേഡിയന്‍ സൂപ്പര്‍ താരം ഇയാന്‍ ഹ്യൂം എന്ന മഞ്ഞപ്പടയുടെ ഹ്യുമേട്ടൻ ബ്ലാസ്റ്റേഴ്‌സ് വിട്ടത് തനിക്കേറെ വിഷമമുണ്ടാക്കിയെന്നു ബ്ലാസ്റ്റേഴ്‌സ് താരം സികെ വിനീത്. മഞ്ഞപ്പടയോട് ആത്മാർത്ഥതയുള്ള മികച്ച പ്രൊഫഷണൽ താരമായിരുന്നു ഹ്യുമേട്ടൻ എന്നും സികെ വിനീത് കൂട്ടിച്ചെർത്തു. ബ്ലാസ്റ്റേഴ്‌സ് ആരാധകർക്ക് നന്ദിയറിയിച്ച് ബ്ലാസ്റ്റേഴ്‌സിൽ നിന്നും വിടവാങ്ങിയ കാര്യം ഹ്യുമേട്ടൻ ആരാധകരെ അറിയിച്ചിരുന്നു.
ബ്ലാസ്റ്റേഴ്സിന്റെ ഏറ്റവും മികച്ച കളിക്കാരനെന്നു ഏത് കേരള ബ്ലാസ്റ്റേഴ്‌സ് ആരാധകനും കണ്ണുമടച്ച് പറയുക ഹ്യൂമേട്ടൻ എന്ന് ആരാധകർ ഇഷ്ടത്തോട് വിളിക്കുന്ന ഇയാൻ ഹ്യൂംമാണ്. താരത്തെ സ്വന്തമാക്കാൻ കേരള ബ്ലാസ്റ്റേഴ്‌സ് മാനേജ്മെന്റിന് താല്പര്യം ഇല്ലാത്തതിനാലാണ് ഹ്യൂമേട്ടൻ ദൈവത്തിന്റെ സ്വന്തം ബ്ലാസ്റ്റേഴ്‌സ് വിടുന്നത് എന്ന് സ്ഥിതികരിച്ചിരുന്നു.
കഴിഞ്ഞ സീസണിന്റെ അവസാനത്തിൽ പരിക്കേറ്റ ഇയാൻ ഹ്യൂമിന് കേരള ബ്ലാസ്റ്റേഴ്സിന്റെ മുഴുവൻ മത്സരങ്ങളും കളിയ്ക്കാൻ കഴിഞ്ഞിരുന്നില്ല. ഈ കഴിഞ്ഞ സീസണിൽ കേരള ബ്ലാസ്റ്റേഴ്സിന് വേണ്ടി കളിച്ച ഹ്യൂമേട്ടൻ 13 മത്സരങ്ങളിൽ നിന്ന് 5 ഗോളും നേടിയിരുന്നു. ഇതിൽ ഡൽഹി ഡൈനാമോസിനെതിരെയുള്ള ഒരു ഹാട്രിക്കും ഉൾപ്പെടും. ഇന്ത്യൻ സൂപ്പർ ലീഗിന്റെ ആദ്യ സീസണിൽ കേരള ബ്ലാസ്റ്റേഴ്സിന്റെ കൂടെ ഉണ്ടായിരുന്ന ഹ്യൂമേട്ടൻ അന്ന് ബ്ലാസ്‌റ്റേഴ്‌സിനെ ഫൈനലിൽ എത്തിക്കുന്നതിൽ നിർണായക പങ്കു വഹിച്ചിരുന്നു.