ഇന്ത്യയിലെ ആദ്യത്തെ പ്രീ സീസൺ ടൂർണമെന്റാണ് ദൈവത്തിന്റെ സ്വന്തം നാടായ കേരളത്തിൽ നടക്കുന്നത്. കേരളത്തിലെ ഫുട്ബോൾ ആരാധകരെ ആവേശത്തിമിർപ്പിലാക്കിക്കൊണ്ട് മലയാളികളുടെ സ്വന്തം കേരള ബ്ലാസ്റ്റേഴ്സ് വിദേശ ക്ലബ്ബുകളോടാണ് ഏറ്റുമുട്ടുന്നത്. മഞ്ഞപ്പടയുടെ ആരാധകരുടെ ആവശ്യപ്രകാരം ടിക്കറ്റ് നിരക്കുകൾ കുറച്ചിരിക്കുകയാണ് സംഘാടകർ. ഏറ്റവും കുറഞ്ഞ നിരക്കിപ്പോൾ 240 രൂപയാക്കി കുറച്ചിട്ടുണ്ട്. മുൻപ് 275 രൂപയായിരുന്നു. വെസ്റ്റ് ഗ്യാലറിയിലെയും, ബ്ലാസ്റ്റേഴ്സിന്റെ ഈസ്റ്റ് ഗ്യാലറിയിലെയും പുതിയ നിരക്ക് 300 രൂപയാണ്. മുൻപിത് 490 രൂപയായിരുന്നു.
ജൂലൈ 24 മുതൽ 28 വരെ കൊച്ചിയിലെ ജവഹർലാൽ നെഹ്റു അന്താരാഷ്ട്ര സ്റ്റേഡിയത്തിലാണ് പ്രീ സീസൺ ടൂർണമെന്റ് നടക്കുക. മെൽബൺ സിറ്റി, ജിറോണ എഫ്‌സി എന്നിവരാണ് ടൂർണമെന്റിൽ ബ്ലാസ്റ്റേഴ്‌സിനോട് ഏറ്റുമുട്ടുന്നത്. പ്രീ സീസൺ ടൂർണമെന്റിന് മുന്നോടിയായുള്ള കേരള ബ്ലാസ്റ്റേഴ്സിന്റെ പരിശീലന ക്യാമ്പ് ഇപ്പോൾ അഹമ്മദാബാദില്‍ നടന്നു കൊണ്ടിരിക്കുകയാണ്.
ഫിക്സ്ചർ
ജൂലൈ 24: കേരള ബ്ലാസ്റ്റേഴ്സ് vs മെൽബൺ സിറ്റി
ജൂലൈ 27: മെൽബൺ സിറ്റി vs ജിറൊണ
ജൂലൈൻ 28: കേരള ബ്ലാസ്റ്റേഴ്സ് vs ജിറോണ