ഇന്ത്യയിലെ ആദ്യത്തെ പ്രീ സീസൺ ടൂര്ണമെന്റിനായി ആരാധകരെ ക്ഷണിച്ച് ബ്ലാസ്റ്റേഴ്‌സിന്റെ സൂപ്പർ താരം അനസ് എടത്തൊടിക. ‘ടിക്കറ്റെടുക്കൂ, കളി കാണാൻ വരൂ’ എന്നാണ് മലയാളി ആരാധകരോട് താരം ആവശ്യപ്പെടുന്നത്. മലയാളികളെല്ലാം പ്രത്യേകിച്ച് മലബാറുകാരെല്ലാം മഞ്ഞപ്പടയ്ക്ക് വേണ്ടി താൻ ആദ്യമായി കളിക്കുന്നത് കാണാൻ എത്തണമെന്നാണ് അനസ് അഭ്യർത്ഥിക്കുന്നത്. അന്തസ്സിന്റെയും അനസിന്റെ ആരാധകരുടെയും ഏറെ നാളത്തെ കാത്തിരിപ്പിനു ശേഷമാണ് കേരള ബ്ലാസ്റ്റേഴ്‌സിന് വേണ്ടി അനസ് ബൂട്ട് കെട്ടുന്നത്.
ടൊയൊട്ടാ യാരിസ് ലാലീഗ വേള്‍ഡ് പ്രീസീസണ്‍ ടൂര്‍ണമെന്റ നാളെയാണ് ആരംഭിക്കുക. ജൂലൈ 24 മുതൽ 28 വരെ കൊച്ചിയിലെ ജവഹർലാൽ നെഹ്റു അന്താരാഷ്ട്ര സ്റ്റേഡിയത്തിലാണ് പ്രീ സീസൺ ടൂർണമെന്റ് നടക്കുക. കൊച്ചിയിൽ ആദ്യം കേരള ബ്ലാസ്റ്റേഴ്‌സ് ഓസ്ട്രലിയൻ ടീമായ മെൽബൺ സിറ്റിയെ ആണ് നേരിടുന്നത്. രണ്ടാമത്തെ മത്സരത്തിൽ അടുത്ത ശനിയാഴ്ച കേരള ബ്ലാസ്റ്റേഴ്‌സ് സ്പാനിഷ് ലാ ലിഗ ടീമായ ജിറോനയെ നേരിടും.