ഐഎസ്എല്ലിൽ തകർപ്പൻ ജയവുമായി കേരള ബ്ലാസ്റ്റേഴ്സ്. മുംബൈയുടെ വല നിറച്ച് മഞ്ഞപ്പട നിറഞ്ഞാടിയപ്പോൾ തുടർച്ചയായ രണ്ടാം ജയം ബ്ലാസ്റ്റേഴ്സിന് സ്വന്തം. എതിരില്ലാത്ത മൂന്ന് ഗോളുകൾക്കാണ് കേരള ബ്ലാസ്റ്റേഴ്സ് ഇന്ന് ജയിച്ച് കയറിയത്. സഹൽ,വാസ്കസ്,ഡയസ് എന്നിവരാണ് കേരള ബ്ലാസ്റ്റേഴ്സിനായി ഗോളടിച്ചത്.
ആദ്യ പകുതിയിൽ മലയാളികളുടെ മെസ്യൂട്ട് ഓസിൽ സഹൽ അബ്ദുൾ സമദാണ് കേരള ബ്ലാസ്റ്റേഴ്സിന് വേണ്ടി ഗോളടിച്ചത്. ഡിയസ് അടിച്ച വെടിക്കെട്ട് ഷോട്ട് ഒരു തകർപ്പൻ വോളിയിലൂടെ സഹൽ ഗോളാക്കിമാറ്റി. ഐഎസ്എല്ലിൽ ഇന്ന് കേരള ബ്ലാസ്റ്റേഴ്സ് അറ്റാക്കിംഗിൽ മുംബൈ സിറ്റി വിറക്കുന്ന കാഴ്ച്ചയാണ് കണ്ടത്. രണ്ടാം പകുതിയിലും ഈ തകർപ്പൻ ഫോം മഞ്ഞപ്പട തുടർന്നു.
ആദ്യം ആല്വാരോ വാസ്കസും പിന്നീട് പെനാൽറ്റി വലയിൽ എത്തിച്ച് ഡയസും ബ്ലാസ്റ്റേഴ്സിനായി ഗോളടിച്ചു. ഇന്നത്തെ തകർപ്പൻ ജയവുമായി കേരള ബ്ലാസ്റ്റേഴ്സ് 9 പോയിന്റുമായി അഞ്ചാം സ്ഥാനത്തേക്ക് ഉയർന്നു. മുംബൈ 15 പോയിന്റുമായി ഒന്നാം സ്ഥാനത്ത് തന്നെയാണ്.