പ്രീസീസൺ മത്സരത്തിൽ കേരള ബ്ലാസ്റ്റേഴ്സ് എഫ് സിക്ക് വിജയം. ഇന്ന് കേരള സന്തോഷ് ട്രോഫി ടീമിനെതിരെ ഇറങ്ങിയ കേരള ബ്ലാസ്റ്റേഴ്സ് ഒരു ഗോളിന് പിറകിൽ പോയ വമ്പൻ തിരിച്ച്വരവിലാണ് വിജയിച്ചത്. ഒഗ്ബെചെ, സിഡോഞ്ച, സാമുവൽ തുടങ്ങിയ പ്രമുഖരെയെല്ലാം ആദ്യ ഇലവനിൽ ഇറക്കിയായിരുന്നു കേരള ബ്ലാസ്റ്റേഴ്സ് ഇറങ്ങിയത്. രണ്ടിനെതിരെ മൂന്നു ഗോളുകളുടെ ജയമാണ് കേരള ബ്ലാസ്റ്റേഴ്സ് നേടിയത്. പ്രീസീസണിൽ കേരള ബ്ലാസ്റ്റേഴ്സിന്റെ രണ്ടാം വിജയമാണിത്.
തുടക്കത്തിൽ മലയാളി ഗോൾകീപ്പർ രെഹ്നേഷിന്റെ ഒരു പിഴവാണ് കേരള ബ്ലാസ്റ്റേഴ്സിന് ഗോൾ വഴങ്ങാൻ കാരണമായത്. കേരള താരം അമ്പാടിയുടെ ഫ്രീകിക്കിൽ രഹ്നേഷിന്റെ പിഴവ് മുതലെടുത്ത് എമിൽ ആണ് കേരള ടീമിനെ മുന്നിൽ എത്തിച്ചത്. ഒരു ഗോളിന് പിറകിൽ പോയ ശേഷം വെടിക്കെട്ട് പ്രകടനം കാഴ്ചവെച്ച കേരള ബ്ലാസ്റ്റേഴ്സ് ഒഗ്ബെചെയിലൂടെ സമനില നേടി.
പിന്നാലെ സിഡോഞ്ച കേരള ബ്ലാസ്റ്റേഴ്സിന് ലീഡും നൽകി. ആദ്യ പകുതിയ 2-1ന് അവസാനിപ്പിച്ച കേരള ബ്ലാസ്റ്റേഴ്സ് എന്നാൽ രണ്ടാം പകുതിയിൽ ആ ലീഡ് കളഞ്ഞു. മൗസിഫിലൂടെയാണ് കേരള സന്തോഷ് ട്രോഫി കളിയിലേക്ക് തിരികെ വന്നത്. പക്ഷെ താമസിയാതെ വീണ്ടും ലീഡ് എടുക്കാൻ മഞ്ഞപ്പടക്ക് കഴിഞ്ഞു. മെസ്സിയാണ് ഇത്തവണ ബ്ലാസ്റ്റേഴ്സിനായി ഗോൾ നേടിയത്.