കേരള ബ്ലാസ്റ്റേഴ്സിന്റെ പുതിയ പരിശീലകനായി കിബു വികൂനയെ ഔദ്യോഗികമായി ബ്ലാസ്റ്റേഴ്സ് പ്രഖ്യാപിച്ചു. ഇന്ന് രാവിലെ സമൂഹ മാധ്യമങ്ങളിലൂടെ ഷറ്റോരിയുമായുള്ള കരാർ അവസാനിപ്പിച്ചു എന്ന് പറഞ്ഞതിന് പിന്നാലെയാണ് ബ്ലാസ്റ്റേഴ്സ് പുതിയ കോച്ചിനെ പ്രഖ്യാപിച്ചത്. ഐ ലീഗിലെ സ്പാനിഷ് മാന്ത്രികൻ കിബു വികൂനയെയാണ് മഞ്ഞപ്പട ടീമിലെത്തിച്ചത്. ഐ ലീഗിൽ ഈ സീസണിൽ മോഹൻ ബഗാനെ കിരീടത്തിലേക്ക് നയിച്ചത് സ്പാനിഷ് പരിശീലകൻ കിബു വികൂനയാണ്. എൽകോ ഷറ്റൊരി പടിയിറങ്ങിയതിന് പിന്നാലെയാണ് കപ്പടിക്കാൻ ഈ കിരീട ജേതാവിനെ ബ്ലാസ്റ്റേഴ്സ് കൊച്ചിയിൽ എത്തിക്കുന്നത്. ഔദ്യോഗിക പ്രഖ്യാപനം വരുന്നതിന് ഒരു മാസം മുൻപ് തന്നെ ബ്ലാസ്റ്റേഴ്സ് ന്യൂസ് ഈ വാർത്ത റിപ്പോർട്ട് ചെയ്തിരുന്നു.
സ്പാനിഷ് ക്ലബ്‌ സി എ ഒസാസുനയുടെ യൂത്ത് ടീം കോച്ചായാണ് വിചുനയുടെ പരിശീലക കരിയർ ആരംഭിക്കുന്നത്. സ്പെയിനിലും പോളണ്ടിലുമായി നിരവധി ക്ലബുകളെ പരിശീലിപ്പിച്ചിട്ടുള്ള കിബു വികൂന യുവ താരങ്ങളെ വളർത്തിയെടുക്കുന്നതിൽ പ്രത്യേക സിദ്ധിയുള കോച്ചാണ്‌ ആണ്. റൗൾ ഗാർഷ്യ ,റയൽ മാഡ്രിഡിന്റെ നാച്ചോ തുടങ്ങിയ താരങ്ങൾ വിചുനയുടെ പരിശീലനത്തിൽ വളർന്നു വന്ന താരങ്ങൾ ആണ്. കേരള ബ്ലാസ്റ്റേഴ്സ് റിസർവ് ബെഞ്ചിൽ നിന്നും മോഹൻ ബഗാനിൽ ലോണിൽ എത്തിയ യുവ താരം നോങ്ധാംബ നയോറം ഒരു മികച്ച വിങ്ങർ ആയി മാറിയത് ഇദ്ദേഹത്തിന്റെ ശിക്ഷണത്തിൽ ആണ്.
എ ടി കെ – ബഗാൻ ലയനത്തിന് ശേഷവും വികൂനയെ കോച്ചാക്കി നിലനിർത്താൻ ബംഗാൾ ക്ലബ്ബിന് താത്പര്യ്മുണ്ടായിരുന്നെങ്കിലും മഞ്ഞപ്പട റാഞ്ചുകയായിരുന്നു.