കൊമ്പന്മാരുടെ അങ്കമിന്ന്. ഐഎസ്എല്ലിൽ കേരള ബ്ലാസ്റ്റേഴ്സ് മോഹൻ ബഗാനെതിരെ ഇന്നിറങ്ങും. ഈ സീസണിലെ ആദ്യ‌മത്സരത്തിൽ കരുത്തരായ ബ്ലാസ്റ്റേഴ്സ് നിലവിലെ ചാമ്പ്യന്മാരായ എടികെ മോഹൻ ബഗാനെ ആണ് നേരിടുക. കിബു വികൂനയുടെ കീഴിൽ ആദ്യ ഒഫീഷ്യൽ മാച്ചിനാണ് ബ്ലാസ്റ്റേഴ്സ് ഇറങ്ങുന്നത്. കൊൽക്കത്തൻ ജയന്റ്സ് മോഹൻ ബഗാനെ ഐ ലീഗ് കിരീടത്തിലേക്ക് എത്തിയത് വികൂനയുടെ കീഴിലാണ്. എടികെയുമായുള്ള മെർജറിന് ശേഷം കരുത്താർജ്ജിച്ച ടീമുമായാണ് ബഗാൻ വരുന്നത്.
അതേ സമയം ബ്ലാസ്റ്റേഴ്സിന്റെ സ്വന്തം ജിങ്കൻ ഇന്ന് കേരള ബ്ലാസ്റ്റേഴ്സിന് എതിരെ ഇറങ്ങുന്നു എന്ന പ്രത്യേകതയും ഇന്നത്തെ മത്സരത്തിനുണ്ട്‌. ഐഎസ്എല്ലിൽ ഇതുവരെ ബ്ലാസ്റ്റേഴ്സിന് വേണ്ടി മാത്രമാണ് ജിങ്കൻ കളിച്ചിട്ടുള്ളത്. ഇത്തവണ എതിരാളിയായിട്ടാണ് മുൻ പ്രതിരോധ നായകൻ വരുന്നത്. ഗോവയിൽ വെച്ച് നടക്കുന്നതിനാൽ മഞ്ഞപ്പട എന്ന മഞ്ഞക്കടൽ കാണാൻ ആർക്കും ഭാഗ്യമുണ്ടാകില്ല. ഇന്ന് വൈകിട്ട് 7.30നാണ് കിക്കോഫ്.