കൊച്ചിയിലേക്ക് ബിലാലിക്കയെത്തുന്നു. ഞെട്ടണ്ട അമൽ നീരദ് – മെഗാസ്റ്റാർ മമ്മൂട്ടി ചിത്രത്തിന്റെ അനൗൺസ്മെന്റ് അല്ല.
ഐ ലീഗിൽ കഴിഞ്ഞ വർഷത്തെ ഏറ്റവും മികച്ച ഗോൾ കീപ്പറായി തിരഞ്ഞെടുക്കപ്പെട്ട ബിലാൽ ഖാനെ ടീമിലെത്തിച്ചിരിക്കുകയാണ് കേരള ബ്ലാസ്റ്റേഴ്സ്.
കഴിഞ്ഞ സീസണിൽ ഐ ലീഗിൽ റിയൽ കാശ്മീരിന് വേണ്ടി മികച്ച പ്രകടനം ബിലാൽ ഖാൻ പുറത്തെടുത്തിരുന്നു. കേരള ബ്ലാസ്റ്റേഴ്സിൽ ഗോൾ കീപ്പർമാർക്കിപ്പോൾ പഞ്ഞമില്ല. അടുത്തിടെയാണ് ഗോകുലത്തിന്റെ സ്പൈഡർമാൻ ഷിബിൻ രാജ് കുനിയിലെത്തിയത്. വൈകാതെ ഗോൾ കീപ്പിംഗ് കോച്ചും കൊച്ചിയിലെത്തി.
പൂനെ സിറ്റിയിൽ നിന്ന് ലോൺ അടിസ്ഥാനത്തിലാണ് ബിലാൽ ഖാൻ കഴിഞ്ഞാ തവണ റിയൽ കാശ്മീരിന് വേണ്ടി കളിച്ചത്. കഴിഞ്ഞ സീസണിൽ കേരളത്തിലെ ഐ ലീഗ് ടീമായ ഗോകുലം കേരളക്ക് വേണ്ടിയും ബിലാൽ ഖാൻ കളിച്ചിട്ടുണ്ട്.
കഴിഞ്ഞ സീസണിൽ ദുരന്തമായി മാറിയ കേരള ബ്ലാസ്റ്റേഴ്സ് അടുത്ത സീസണിലേക്ക് മികച്ച താരങ്ങളെ ടീമിലെത്തിച്ച് ഐ.എസ്.എൽ കിരീടം കേരളത്തിലെത്തിക്കാനുള്ള ശ്രമത്തിലാണ്. സി.ഇ.ഓ സ്ഥാനത്ത് വീരൻ ഡി സിൽവയെ നിയമിച്ച കേരള ബ്ലാസ്റ്റേഴ്സ് സൂപ്പർ താരങ്ങളെ ബ്ലാസ്റ്റേഴ്സിൽ എത്തിച്ച് മഞ്ഞപ്പടയെ ഉടച്ച് വാർക്കുകയാണ്.