കേരള ബ്ലാസ്റ്റേഴ്സ് മലയാളി യുവ സ്ട്രൈക്കറെ ടീമിലെത്തിക്കും. ഏറെക്കാലത്തെ കാത്തിരിപ്പിന് ശേഷം കേരളത്തിന്റെ സ്വന്തം സ്ട്രൈക്കർ ജോബി ജസ്റ്റിൻ കേരള ബ്ലാസ്റ്റേഴ്സിലേക്ക് എത്തും. നിലവിൽ എ ടി കെ കൊൽക്കത്തയുടെ താരമായ ജോബിയുമായി കേരള ബ്ലാസ്റ്റേഴ്സ് ചർച്ചകൾ പുരോഗമിക്കുന്നു. ഏറെ വൈകാതെ യുവതാരത്തെ ബ്ലാസ്റ്റേഴ്സ് കൊച്ചിയിലെത്തിക്കും. മലയാളി താരമായതു കൊണ്ടു തന്നെ കേരള ബ്ലാസ്റ്റേഴ്സിന്റെ ഏത് ഓഫറും ജോബി സ്വീകരിക്കാൻ തയ്യാറായേക്കും.
ഈ സീസണിൽ എ ടി കെ കൊൽക്കത്തയ്ക്ക് ഒപ്പം ഐ എസ് എൽ കിരീടം നേടിയെങ്കിലും ജോബിക്ക് കൊൽകത്തയിൽ കൂടുതൽ അവസരം ലഭിച്ചിരുന്നില്ല. പത്ത് മത്സരങ്ങൾ മാത്രമാണ് എ ടി കെ കൊൽക്കത്തയ്ക്ക് വേണ്ടി കളിക്കാൻ ജോബി ജസ്റ്റിന് ആയത്. ഇതിൽ ഭൂരിഭാഗവും പകരക്കാരനായാണ് ജോബി കളത്തിൽ ഇറങ്ങിയത്.
ഒരു ഗോളും ഒരു അസിസ്റ്റും ലീഗിൽ എ ടി കെ കൊൽക്കത്തയ്ക്കായുള്ള ജോബിയുടെ ഈ സീസണിലെ സമ്പാവന. ഈ സീസൺ തുടക്കത്തിൽ ആയിരുന്നു മുൻ കൊൽക്കത്തൻ ചാമ്പ്യന്മാാരായിരുന്ന ഈസ്റ്റ് ബംഗാൾ വിട്ട് ജോബി ജസ്റ്റിൻ എ ടി കെയിലേക്ക് എത്തിയത്. കൊച്ചിയിലെ മഞ്ഞക്കടലിൽ വെടിക്കെട്ട് പ്രകടനം പുറത്തെടുക്കാൻ ജോബിക്ക് ആവുമെന്നാണ് പ്രതീക്ഷ.