ഇന്ത്യൻ സൂപ്പർ ലീഗിലെ ആദ്യ മത്സരത്തിൽ തകർപ്പൻ ജയവുമായി കേരള ബ്ലാസ്റ്റേഴ്സ്. പിന്നിൽ നിന്നും തിരിച്ച് വന്ന് വെടിക്കെട്ട് ജയമാണ് കേരള ബ്ലാസ്റ്റേഴ്സ് നേടിയത്. ഒരു ഫീനിക്സ് പക്ഷിയെപ്പോലെ ഉയർത്തെഴുന്നേൽക്കുന്ന ബ്ലാസ്റ്റേഴ്സിനെയാണ് ഇന്ന് കളിക്കളത്തിൽ കാണാൻ സാധിച്ചത്. ഇരട്ട ഗോളുകളുമായി മുന്നിൽ നിന്ന് നയിച്ച് ക്യാപ്റ്റൻ ഒഗ്ബചെയാണ് ബ്ലാസ്റ്റേഴ്സിന് മുന്തൂക്കം നേടിക്കൊടുത്തത്. അഞ്ചാം മിനുട്ടിൽ എടികെ മാഖ്യുവിലൂടെ ആദ്യ ഗോൾ നേടി. പിനീട് കളി എടികെ നിർണയിച്ചു.
വീണ്ടും ബ്ലാസ്റ്റേഴ്സ് ഗോൾ വഴങ്ങുമെന്ന് തോന്നിച്ചെങ്കിലും പ്രതിരോധം കട്ടക്ക് നിന്നു. 28ആം മിനുട്ടിൽ ഒരു പെനാൾട്ടിയിൽ നിന്നായിരുന്നു കേരള ബ്ലാസ്റ്റേഴ്സിനായി ഒഗ്ബചെ ആദ്യ ഗോൾ നേടിയത്. ജൈറോയെ ബോക്സിൽ വീഴ്തിയതിനാണ് പെനാൽറ്റി ലഭിച്ചത്. ഒന്നാം പകുതി അവസാനിക്കും മുൻപ് പ്രശാന്ത് ക്രോസ് മുതലാക്കി വെടിക്കെട്ട് ഷോട്ടിലൂടെ ഒഗ്ബചെ ബ്ലാസ്റ്റേഴ്സിനെ മുന്നിലെത്തിച്ചു. രണ്ടാം പകുതിയിൽ കേരള ബ്ലാസ്റ്റേഴ്സിനെ ബ്രസീലിയൻ താരം ജൈറോ റോഡ്രിഗസ് രണ്ട് ഗോളിന്റെ ലീഡ് നൽകിയെന്ന് കരുതിയെങ്കിലും കപ്പിനും ചുണ്ടുമിടയിൽ ആ അവസരം നഷ്ടമായി. ക്യാപ്റ്റൻ ബർതലമോവ് ഒഗ്ബചെ തന്നെയാണ് ഹീറോ ഓഫ് ദ് മാച്ച്. ഒരു മരണമാസ്സ് തിരിച്ച് വരവ് കേരള ബ്ലാസ്റ്റേഴ്സ് ഐഎസ് എല്ലിന്റെ ആറാം സീസൺ ജയത്തോടെ ആരംഭിച്ചു.