ഇന്ത്യൻ സൂപ്പർ ലീഗിൽ ഒരു വെടിക്കെട്ട് മത്സരത്തിനായി കളമൊരുങ്ങുന്നു. കടുത്ത എതിരാളികളായ ബെംഗളൂരു എഫ്സി കേരള ബ്ലാസ്റ്റേഴ്സിനെ ബെംഗളൂരുവിൽ വെച്ച് നേരിടും. അതേ സമയം ബ്ലാസ്റ്റേഴ്സിനെതിരായ മത്സരത്തിൽ ബിരിയാണി നൽകി ആളെ കൂട്ടാൻ ബെംഗളൂരു എഫ്സി ആരാധകർ ശ്രമിക്കുന്നു. സോഷ്യൽ മീഡിയയിലൂടെ പ്രചരിക്കുന്ന പോസ്റ്ററിലാണ് ഇത്തരത്തിൽ ഒരു ആഹ്വാനം ഉണ്ടായിരിക്കുന്നത്‌.
ഏറ്റവുമധികം കാണികൾ ഇരമ്പിയെത്തുന്ന ഹോം സ്റ്റേഡിയമെന്ന ബ്ലാസ്റ്റേഴ്സിന്റെ റെക്കോർഡാണ് ബെംഗളൂരു ലക്ഷ്യം വെക്കുന്നത്‌. ബെംഗളൂരു ജേഴ്സിയണിഞ്ഞ് സ്റ്റേഡിയത്തിൽ എത്തണമെന്നാണ് ബെംഗളൂരു ആരാധകരുടെ ആഹ്വാനം. ബിരിയാണി ചിക്കനാണോ മട്ടനാണോ എന്നൊന്നും ഈ പോസ്റ്ററുകളിൽ വ്യക്തമാക്കിയിട്ടില്ല. ബിരിയാണി വെച്ച് ആളെക്കൂട്ടുന്ന പരിപാടിയെ ട്രോളി കൊല്ലുകയാണ് ഫുട്ബോൾ ആരാധകർ. ബെംഗളൂരുവിന്റെ ഒഫീഷ്യൽ ആരാധകർ ഇതിനെക്കുറിച്ച് പ്രതികരിച്ചിട്ടില്ല.