ഇന്ത്യൻ താരങ്ങളിൽ ഏറ്റവും മികച്ച താരം മഞ്ഞപ്പടയുടെ മെസ്യൂട്ട് ഓസിൽ സഹൽ അബ്ദുൾ സമദ് ആണെന്ന് കിബു വികൂന. ഒരു പോളിഷ് ചാനലിന് നൽകിയ അഭിമുഖത്തിലാണ് ബ്ലാസ്റ്റേഴ്സ് കോച്ച് കിബു വികൂന സഹലിനെ പരാമർശിച്ചത്. ഇന്ത്യയിൽ എല്ലാവരും സുനിൽ ഛേത്രിയെ ആണ് മികച്ച താരമായി കണക്കാക്കുന്നത്. എന്നാൽ എന്നെ സംബന്ധിച്ചിടത്തോളം സഹലാണ് മികച്ച താരം. താൻ ഛേത്രിയുടെ കളി കണ്ടിരുന്നു. ഛേത്രി നല്ലതാാരം തന്നെ എങ്കിലും സഹലിനോടൊപ്പം വലിയ താരമല്ല എന്ന് കിബു വികൂന പറഞ്ഞു.
സഹൽ ഒരു യുവതാരമാണ്. കരിയറിന്റെ തുടക്കമാണിപ്പോൾ. അതേ സമയം പ്രായം ഛേത്രിക്ക് പ്രശ്നമാണ്. അതുകൊണ്ട് തന്നെ ഇപ്പോൾ ഇന്ത്യയിലെ ഏറ്റവും മികച്ച താരം സഹലാണ് എന്ന് വികൂന പറയുന്നു. സഹലിന്റെ കഴിഞ്ഞ സീസണിലെ എല്ലാ മത്സരങ്ങളും താൻ കണ്ടിട്ടുണ്ട്. ഇന്ത്യയിലെ ഒരു താരത്തിനും ഇല്ലാത്ത കാഴ്ചപ്പാട് ഗ്രൗണ്ടിൽ സഹലിനുണ്ട്. ഏറെ വിഷനുള്ള താരമാണ് ബ്ലാസ്റ്റേഴ്സിന്റെ സഹൽ. സഹലിന്റെ പാസുകളും ചിന്തകളും വളരെ മികച്ചതാണെന്നും വികൂന പറഞ്ഞു.