കേരള ബ്ലാസ്റ്റേഴ്സ് ആരാധകർക്ക് ഞെട്ടൽ. മഞ്ഞപ്പടയുടെ പ്രതിരോധ നായകൻ സന്ദേശ് ജിങ്കൻ ക്ലബ്ബ് വിടുന്നു. പ്രമുഖ സ്പോർട്സ് മാധ്യമമായ ഗോൾ. കോമാണ് ജിങ്കൻ കേരള ബ്ലാസ്റ്റേഴ്സ് വിടുന്ന കാര്യം പുറത്ത് വിട്ടത്. ആറ് സീസണാായി കേരള ബ്ലാസ്റ്റേഴ്സിന്റെ വൻ മതിൽ ആയിരുന്നു ജിങ്കൻ.
ജിങ്കൻ ക്ലബ്ബ് വിടുമെന്നത് ബ്ലാസ്റ്റേഴ്സ് ആരാധകരെ സംബന്ധിച്ചടുത്തൊളം ഞെട്ടിപ്പിക്കുന്ന വാർത്തയാണ്. ബ്ലാസ്റ്റേഴ്സിന് വേണ്ടി ഏറ്റവുമധികം മത്സരം (76) കളിച്ചത് ജിങ്കനാണ്. കേരള ബ്ലാസ്റ്റേഴ്സിന്റെ ക്ലബ്ബ് ലെജന്റ് എന്ന് വിളിക്കാവുന്ന താരം. കേരള ബ്ലാസ്റ്റേഴ്സ് കടുത്ത സാമ്പത്തിക പ്രതിസന്ധിയിലാണെന്ന് റിപ്പോർട്ടുണ്ടായിരുന്നു. ഇതിന്റെ ഭാഗമായാണ് ജിങ്കൻ ക്ലബ്ബ് വിടുന്നതെന്നാണ് റിപ്പോർട്ട്.
ഇന്ത്യൻ ടീമിന്റെ സ്ഥിരം സെന്റർ ബാക്കാണ് ജിങ്കൻ. കേരള ബ്ലാസ്റ്റേഴ്സിന്റെ പ്രിയ താരമായ ജിങ്കന് ഈ സീസണിൽ പരിക്ക് കാരണം ഒരു മത്സരം വരെ കളിക്കാൻ ആയിരുന്നില്ല. എങ്കിലും ബ്ലാസ്റ്റേഴ്സ് ആരാധർക്ക് എപ്പോളും പൂർണ പിന്തുണ നൽകാൻ ജിങ്കൻ എന്നും മുൻപന്തിയിലുണ്ടായിരുന്നു.