കേരള ബ്ലാസ്റ്റേഴ്സിൽ ഇനി കളി വേറെ ലെവൽ. വ്യത്യസ്തമായൊരു ഫുട്ബോൾ ശൈലി ആയിരിക്കും കേരള ബ്ലാസ്റ്റേഴ്സിൽ നടപ്പിലാക്കുക എന്ന് പുതിയ പരിശീലകൻ കിബു വികൂന. തന്റെ ടാറ്റിക്സുകൾ വ്യത്യസ്തമാണെന്ന് കിബു വികൂന പറഞ്ഞു. തനിക്ക് പൊസഷൻ ഫുട്ബോൾ കളിക്കാൻ തന്നെയാണ് ഇഷ്ടം. എന്നാൽ അത് കഴിഞ്ഞ സീസണിൽ കേരള ബ്ലാസ്റ്റേഴ്സ് ഷറ്റോരിക്ക് കീഴിൽ കളിച്ചതു പോലെയാകില്ലെന്നും വികൂന പറയുന്നു.
ഡച്ച് പരിശീലകൻ എൽകോ ഷറ്റോരിക്ക് കീഴിൽ കേരള ബ്ലാസ്റ്റേഴ്സ് കളിച്ചപ്പോൾ ഐ എസ് എല്ലിൽ തന്നെ ഏറ്റവും നല്ല പൊസഷൻ റെക്കോർഡ് മഞ്ഞപ്പടക്കായിരുന്നു. പല മത്സരത്തിലും എതിരാളികളേക്കാൾ പന്ത് കാലിൽ ഉണ്ടായിരുന്നത് കേരള ബ്ലാസ്റ്റേഴ്സിനായിരുന്നു. എങ്കിലും പന്ത് കാലിൽ വെക്കുന്നതിൽ അല്ല കാര്യം, ആ പന്ത് കൊണ്ട് എന്ത് ചെയ്യുന്നു എന്നതിലാണ് കാര്യം എന്ന് വികൂന പറയുന്നു. ഐ ലീഗിൽ ഏറ്റവുമധികം ഷോട്ട് ഓൺ ടാർഗറ്റ് ഉണ്ടായിരുന്നത് മോഹൻ ബഗാനായിരുന്നു. ഇതേ കളികൾ ബ്ലാസ്റ്റേഴ്സിൽ ഇറക്കാനാണ് വികൂനയുടെ ലക്ഷ്യം.