കേരള ബ്ലാസ്റ്റേഴ്സിലേക്കില്ലെന്ന് പറഞ്ഞ് മലയാളി യുവതാരം ജോബി ജസ്റ്റിൻ. കേരള ബ്ലാസ്റ്റേഴ്സ് ഈ സീസണിൽ സ്വന്തമാക്കുമെന്ന് കരുതിയ താരങ്ങളിൽ ഒരാളായിരുന്നു ജോബി. എന്നാൽ കൊൽകത്തയിൽ തന്നെ തുടരുമെന്നും ഇത്തവണ മഞ്ഞപ്പടയിലേക്കില്ലെന്നുമാണ് അദ്ദേഹം പറയുന്നത്‌. തന്നെ ബ്ലാസ്റ്റേഴ്സിൽ നിന്നും ആരും സമിപിച്ചിട്ടില്ലെന്നും ജോബി ജസ്റ്റിൻ കൂട്ടിച്ചേർത്തു.
ഈ സീസണിൽ എ ടി കെ കൊൽക്കത്തയ്ക്ക് ഒപ്പം ഐ എസ് എൽ കിരീടം നേടിയെങ്കിലും ജോബിക്ക് കൊൽകത്തയിൽ കൂടുതൽ അവസരം ലഭിച്ചിരുന്നില്ല. പത്ത് മത്സരങ്ങൾ മാത്രമാണ് എ ടി കെ കൊൽക്കത്തയ്ക്ക് വേണ്ടി കളിക്കാൻ ജോബി ജസ്റ്റിന് ആയത്. ഇതിൽ ഭൂരിഭാഗവും പകരക്കാരനായാണ് ജോബി കളത്തിൽ ഇറങ്ങിയത്.
ഒരു ഗോളും ഒരു അസിസ്റ്റും ലീഗിൽ എ ടി കെ കൊൽക്കത്തയ്ക്കായുള്ള ജോബിയുടെ ഈ സീസണിലെ സംഭാവന. ഈ സീസൺ തുടക്കത്തിൽ ആയിരുന്നു മുൻ കൊൽക്കത്തൻ ചാമ്പ്യന്മാാരായിരുന്ന ഈസ്റ്റ് ബംഗാൾ വിട്ട് ജോബി ജസ്റ്റിൻ എ ടി കെയിലേക്ക് എത്തിയത്.