കൊൽക്കത്ത കീഴടക്കി കേരള ബ്ലാസ്റ്റേഴ്സ്. ഇന്ത്യൻ സൂപ്പർ ലീഗിനെ ആദ്യ മത്സരത്തിൽ കേരള ബ്ലാസ്റ്റേഴ്സിന് വമ്പൻ വിജയം. എ ടികെയെ കൊൽക്കത്തയിൽ ചെന്ന് നേരിട്ട കേരള ബ്ലാസ്റ്റേഴ്സ് ഏകപക്ഷീയമായ രണ്ടു ഗോളുകൾക്കായിരുന്നു ജയിച്ചത്. രണ്ട് വിദേശ സ്ട്രൈക്കേഴ്സും ഗോളടിച്ച് മഞ്ഞപ്പടയുടെ കടം വീട്ടി.
ആദ്യ ഇലവനിൽ ഏക മലയാളി താരം സഹൽ മികച്ച പ്രകടനമാണ് മഞ്ഞപ്പടയ്ക്ക് വേണ്ടി കാഴ്ച വെച്ചത്. രണ്ടാം പകുതിയിൽ കളിയുടെ നിയന്ത്രണം കയ്യാളിയ ബ്ലാസ്റ്റേഴ്സ് ഈ സീസണിലെ ആദ്യ ഗോൾ നേടി. മറ്റെഹ് പൊപ്ലാനിക് ആണ് ലീഗിലെയും മഞ്ഞപ്പടയുടെയും ആദ്യ ഗോൾ നേടിയത്.
സ്റ്റഹാനോവിചിന്റെ ഷോട്ട് ഡിഫ്ലക്റ്റഡ് ആയി ഉയർന്നപ്പോൾ ഒരു ഹെഡറിലൂടെ പൊപ്ലാനിക് വലയിൽ എത്തിക്കുകയായിരുന്നു. മത്സരം അവസാനിക്കാൻ നാല് മിനുട്ട് ബാക്കി നിൽക്കെ സ്റ്റഹോനാവിചിലൂടെ കേരള ബ്ലാസ്റ്റേഴ്സ് രണ്ടാം ഗോളടിച്ചു. സികെ വിനീതിന്റെ വരവിനു ശേഷമാണ് കളി ബ്ലാസ്റ്റേഴ്‌സിന്റെ വരുതിയിലായത്.