പ്രീ സീസൺ മാച്ചിൽ കേരള ബ്ലാസ്റ്റേഴ്സിനെ അട്ടിമറിച്ച് റിയൽ കാശ്മീർ എഫ്സി. ഇന്ത്യൻ സൂപ്പർ ലീഗിലെ കരുത്തരായ കേരള ബ്ലാസ്റ്റേഴ്സിനെ എതിരില്ലാത്ത ഒരു ഗോളിനാണ് ഐ ലീഗിലെ കറുത്ത കുതിരകളായ റിയൽ കാശ്മീർ വീഴ്ത്തിയത്. റിയൽ കാശ്മീരിന് വേണ്ടി ഐവറിയൻ താരം ക്രിസോ ആണ് ഗോൾ നേടിയത്. ബ്ലാസ്റ്റേഴ്സ് താരം ഹക്കുവിന്റെ പിഴവ് മുതലെടുത്താണ് കാശ്മീർ ക്ലബ്ബ് ജയം നേടിയത്.
കർണാടക ക്ലബ്ബായ സൗത്ത് യുണൈറ്റഡിനെതിരെ വമ്പൻ ജയം നേടിയ ബ്ലാസ്റ്റേഴ്സിനിത് അപ്രതീക്ഷിതമായ അടിയായി. അന്ന് ഒന്നിനെതിരെ മൂന്ന് ഗോളുകളുടെ ജയമാണ് ബ്ലാസ്റ്റേഴ്സ് നേടിയത്. കളിയിൽ ബ്ലാസ്റ്റേഴ്സിന്റെ സിഡോയും സാമുവലും വെടിക്കെട്ട് പ്രകടനമാണ് പുറത്തെടുത്തത്. യുഎഇയിലെ പ്രീ സീസൺ മത്സരത്തിൽ ബ്ലാസ്റ്റേഴ്സ് സമനില പിടിച്ചിരുന്നു. ഇനി രണ്ട് മത്സരങ്ങൾ കൂടി പ്രീ സീസണിൽ ബ്ലാസ്റ്റേഴ്സ് കളിക്കുമെന്നാണ് പുറത്ത് വരുന്ന വിവരങ്ങൾ