ഇന്ത്യൻ സൂപ്പർ ലീഗിലെ മികച്ച മികച്ച മിഡ്ഫീൽഡറിനുള്ള പുരസ്കാരം ബ്ലാസ്റ്റേഴ്സിന്റെ മെസ്യുട്ട് ഓസിൽ എന്നറിയപ്പെടുന്ന യുവതാരം സഹൽ അബ്ദുൾ സമദ് സ്വന്തമാക്കി. ആരാധകരുടെ വോട്ടെടുപ്പിലൂടെ ആയിരുന്നു മികച്ച മിഡ്ഫീൽഡറെ തിരഞ്ഞെടുത്തത്. എതിരാളികളെ എല്ലാം നിഷ്പ്രഭരാക്കി ബ്ലാസ്റ്റേഴ്സിന്റെ മുത്ത് ഈ നേട്ടം സ്വന്തമാക്കുകയായിരുന്നു.
ചരിത്രത്തിലെ ഏറ്റവും മോശം സീസൺ കേരള ബ്ലാസ്റ്റേഴ്‌സ് ഏറ്റുവാങ്ങിയെങ്കിലും തകർപ്പൻ പ്രകടനമാണ് ഈ യുവതാരം കാഴ്ചവെച്ചത്. സഹലിനെ കാണാൻ വേണ്ടി മാത്രം കളി കാണുന്ന ഒരു ആരാധക വൃന്ദത്തെ സ്വന്തമാക്കാൻ അദ്ദേഹത്തിന് സാധിച്ചിട്ടുണ്ട്. വിദേശ ക്ലബ്ബുകളിൽ നിന്നുള്ള ഓഫറുകൾ വരെ ഒഴിവാക്കിയാണ് സഹൽ മഞ്ഞപ്പടയിൽ തന്നെ തുടരുമെന്നറിയിച്ചിരുന്നു.
കേരള ബ്ലാസ്റ്റേഴ്സിന്റെ 18ആം നമ്പർ ജേഴ്സിയണിയുന്ന സഹൽ ആരാധകർക്ക് ആവേശമാണ്. കേരള ബ്ലാസ്റ്റേഴ്സിന് വേണ്ടി ഇന്ത്യൻ സൂപ്പർ ലീഗിൽ പുറത്തെടുത്ത പ്രകടനം സഹലിനെ ഇന്ത്യൻ അണ്ടർ 23 ടീമിൽ എത്തിച്ചിരുന്നു. ജർമ്മനിക്ക് ഓസിൽ എത്രത്തോളം വേണ്ടപ്പെട്ടവനായിരുന്നോ അതിലേറെ ആവശ്യമാണ് ബ്ലാസ്റ്റേഴ്സിന് സഹലിനെ.സഹലിന്റെ ഈ സീസണിലെ മികച്ച പ്രകടനം താരത്തെ ഇന്ത്യൻ ടീമിലും എത്തിച്ചിരുന്നു. ഇന്ത്യൻ അണ്ടർ 23ൽ കഴിഞ്ഞ ദിവസം ഖത്തറിനെതിരെ സഹൽ കളിച്ചിരുന്നു. ഈ സീസണിൽ സഹൽ കേരള ബ്ലാസ്റ്റേഴ്സിന് വേണ്ടി തന്റെ ആദ്യ ഗോളും താരം നേടിയിരുന്നു.