പരാജയത്തിലും തലയുയർത്തി നിന്ന കേരളാ ബ്ലാസ്റ്റേഴ്സിനോടുള്ള ഇഷ്ടം വെളിപ്പെടുത്തി മെൽബൺ സിറ്റി പ്രതിരോധതാരം ലൂക്ക് ബ്രട്ടൻ. ആദ്യ പ്രീ സീസൺ ടൂർണമെന്റ് മത്സരത്തിന് മുന്നോടിയായിട്ടായിരുന്നു താരം തന്റെ ആഗ്രഹം തുറന്നു പറഞ്ഞത്. ബ്ലാസ്റ്റേഴ്‌സിന്റെ ആരാധകരെയും അന്തരീക്ഷത്തെയും ഇഷ്ടപ്പെട്ടെന്നും എന്നെങ്കിലുമൊരിക്കൽ മഞ്ഞപ്പടയോടൊത്തു കളിയ്ക്കാൻ ആഗ്രഹമുണ്ടെന്നും അദ്ദേഹം വെളിപ്പെടുത്തി.
കഴിഞ്ഞ കുറച്ച് സീസണുകളായി ഇന്ത്യൻ സൂപ്പർ ലീഗ് കാണാറുണ്ടെന്നു തുറന്നു പറഞ്ഞ ലൂക്ക് ബ്രട്ടൻ ഫുട്ബോൾ ആരാധകരുടെ ഇഷ്ട ടീമായ ബ്ലാസ്‌റ്റേഴ്‌സിനെ കുറിച്ചും താൻ അറിഞ്ഞിട്ടുണ്ടെന്നും പറഞ്ഞു. മികച്ച താരങ്ങൾ പന്ത് തട്ടുന്ന ലീഗാണ് ഇന്ത്യൻ സൂപ്പർ ലീഗ്. ഫുട്ബോൾ ആരാധകരാൽ സമ്പൂർണമാണ് ഇന്ത്യൻ ഫുട്ബോൾ. കേട്ടറിവിലും കൂടുതലായിരുന്നു മഞ്ഞപ്പടയുടെ ഫുട്ബോൾ സ്നേഹം എന്നും കൂടെ കൂട്ടിച്ചേർത്ത് ലൂക്ക് ബ്രട്ടൻ അവസാനിപ്പിച്ചു. ഇനി ജൂലൈ 27ന് ജിറോണ എഫ് സിയുമായാണ് കൊച്ചിയിൽ മെൽബൺ എഫ് സിയുടെ അടുത്ത മത്സരം. ജൂലൈ 28നാണ് ജിറോണ എഫ് സി – കേരള ബ്ലാസ്റ്റേഴ്‌സ് പോരാട്ടം.