ആരാധകർക്കൊരു സന്തോഷ വാർത്ത, മഞ്ഞപ്പടയുടെ പ്രീസീസൺ മത്സരങ്ങൾ തത്സമയം കാണാം

ബ്ലാസ്റ്റേഴ്‌സ് ആരാധകരുടെ പ്രാർത്ഥനകൾ ഫലം കണ്ടു. കേരള ബ്ലാസ്റ്റേഴ്‌സിന്റെ പ്രീസീസൺ ടൂർണമെന്റ് മത്സരങ്ങൾ ലോകമെമ്പാടുമുള്ള മഞ്ഞപ്പടയുടെ ആരാധകർക്ക് തത്സമയം കാണാം. ഇന്ത്യൻ ടെലിവിഷൻ ചരിത്രത്തിലാദ്യമാണ് ഒരു ക്ലബ്ബിന്റെ പ്രീ സീസൺ മത്സരങ്ങൾ തത്സമയ സംപ്രേക്ഷണം ഉണ്ടാവുന്നത്. കൊച്ചിയിലെത്തിച്ചേരാൻ സാധിക്കാത്ത ലക്ഷക്കണക്കിന് ബ്ലാസ്റ്റേഴ്‌സ് ആരാധകർക്ക് ഇതൊരു ആശ്വാസമായി.

മലയാളം ചാനലായ ഫ്ളവേഴ്സിലും ഹോട്ട് സ്റ്റാറിലും സ്റ്റാർ സ്പോർട്സിലും പ്രീ സീസൺ ടൂർണമെന്റ് ആരാധകർക്ക് കാണാം. പ്രീ സീസൺ ടൂർണമെന്റിനായി 31 അംഗ സ്ക്വാഡിനെയാണ് മഞ്ഞപ്പടയുടെ ആശാൻ ഡേവിഡ് ജെയിംസ് പ്രഖ്യാപിച്ചത്. 11 മലയാളികൾ ബ്ലാസ്റ്റേഴ്സ് ടീമിലിടം നേടിയിട്ടുണ്ട്.

ജൂലൈ 24 മുതൽ 28 വരെ കൊച്ചിയിലെ ജവഹർലാൽ നെഹ്റു അന്താരാഷ്ട്ര സ്റ്റേഡിയത്തിലാണ് പ്രീ സീസൺ ടൂർണമെന്റ് നടക്കുക. മെൽബൺ സിറ്റി, ജിറോണ എഫ്‌സി എന്നിവരാണ് ടൂർണമെന്റിൽ ബ്ലാസ്റ്റേഴ്‌സിനോട് ഏറ്റുമുട്ടുന്നത്. പ്രീ സീസൺ ടൂർണമെന്റിന് മുന്നോടിയായുള്ള കേരള ബ്ലാസ്റ്റേഴ്‌സിന്റെ പരിശീലന ക്യാമ്പ് ഇപ്പോൾ അഹമ്മദാബാദില്‍ നടന്നു കൊണ്ടിരിക്കുകയാണ്.