പ്രീ സീസൺ പരിശീലന ക്യാമ്പിനായി കേരള ബ്ലാസ്റ്റേഴ്‌സ് അഹമ്മദാബാദിലേക്ക് തിരിച്ചു. ലാ ലിഗ ടീമായ ജിറോണയെയും ഓസ്‌ട്രേലിയൻ ടീമായ മെൽബൺ സിറ്റിയെയും കൊച്ചിയിൽ വെച്ചാണ് പ്രീ സീസൺ ടൂർണമെന്റിൽ കേരള ബ്ലാസ്റ്റേഴ്‌സ് നേരിടുക. കേരളാ ബ്ലാസ്റ്റേഴ്‌സ് ആരാധകരുടെ കൂട്ടായ്മയായ മഞ്ഞപ്പടയാണ് ബ്ലാസ്റ്റേഴ്‌സ് താരങ്ങൾ യാത്ര തിരിച്ചതിന്റെ ചിത്രങ്ങൾ പങ്കുവെച്ചത്.
ജൂലൈ 24 മുതൽ 28 വരെ കൊച്ചിയിലെ ജവഹർലാൽ നെഹ്റു അന്താരാഷ്ട്ര സ്റ്റേഡിയത്തിലാണ് പ്രീ സീസൺ ടൂർണമെന്റ് നടക്കുക. പ്രീ സീസൺ തുടങ്ങുന്നതിനു മുൻപായി തന്നെ കേരള ബ്ലാസ്റ്റേഴ്‌സ് മികച്ച വിദേശ താരങ്ങളെയും ടീമിലെത്തിച്ചു കഴിഞ്ഞു.
കഴിഞ്ഞ സീസണിൽ കേരള ബ്ലാസ്റ്റേഴ്സിന് വേണ്ടി മികച്ച പ്രകടനം കാഴ്ചവെച്ച പെകുസൺ, പെസിച്ച്, കിസിറ്റോ കേസിറോൺ എന്നിവരെ വീണ്ടും ടീമിൽ എത്തിച്ചിട്ടുണ്ട്. കൂടാതെ ഫ്രഞ്ച് പ്രതിരോധ താരം സിറിൽ കാലി, സെർബിയൻ മുന്നേറ്റ താരം സ്ലാവിസ സ്റ്റോഹനോവിച്ച്, സ്ലോവേനിയൻ താരം മറ്റേ പ്ലോപനിക്ക് എന്നിവരെയും ബ്ലാസ്റ്റേഴ്‌സ് സ്വന്തമാക്കി.