പ്രീ സീസൺ ടൂർണമെന്റിന് മുന്നോടിയായുള്ള കേരള ബ്ലാസ്റ്റേഴ്‌സിന്റെ പരിശീലന ക്യാമ്പ് കേരളത്തിന് പുറത്ത്. അഹമ്മദാബാദില്‍ വെച്ചായിരിക്കും മഞ്ഞപ്പടയുടെ പരിശീലന ക്യാമ്പ് നടക്കുക. ലാ ലിഗ ടീമായ ജിറോണയെയും ഓസ്‌ട്രേലിയൻ ടീമായ മെൽബൺ സിറ്റിയെയും കൊച്ചിയിൽ വെച്ചാണ് പ്രീ സീസൺ ടൂർണമെന്റിൽ കേരള ബ്ലാസ്റ്റേഴ്‌സ് നേരിടുക.
ജൂലൈ 24 മുതൽ 28 വരെ കൊച്ചിയിലെ ജവഹർലാൽ നെഹ്റു അന്താരാഷ്ട്ര സ്റ്റേഡിയത്തിലാണ് പ്രീ സീസൺ ടൂർണമെന്റ് നടക്കുക. പ്രീ സീസൺ തുടങ്ങുന്നതിനു മുൻപായി തന്നെ കേരള ബ്ലാസ്റ്റേഴ്‌സ് മികച്ച വിദേശ താരങ്ങളെയും ടീമിലെത്തിച്ചു കഴിഞ്ഞു.
കഴിഞ്ഞ സീസണിൽ കേരള ബ്ലാസ്റ്റേഴ്സിന് വേണ്ടി മികച്ച പ്രകടനം കാഴ്ചവെച്ച പെകുസൺ, പെസിച്ച്, കിസിറ്റോ കേസിറോൺ എന്നിവരെ വീണ്ടും ടീമിൽ എത്തിച്ച കേരള ബ്ലാസ്റ്റേഴ്‌സ് മികച്ച പുതിയ 3 താരങ്ങളെ ടീമിലെത്തിച്ച് ആക്രമണ നിരയിലും പ്രതിരോധ നിരയിലും മികച്ച വിദേശ സാന്നിദ്ധ്യം ഉറപ്പു വരുത്തി. ഫ്രഞ്ച് പ്രതിരോധ താരം സിറിൽ കാലി, സെർബിയൻ മുന്നേറ്റ താരം സ്ലാവിസ സ്റ്റോഹനോവിച്ച്, സ്ലോവേനിയൻ താരം മറ്റേ പ്ലോപനിക്ക് എന്നിവരെയാണ് ബ്ലാസ്റ്റേഴ്‌സ് കൊച്ചിയിലെത്തിച്ചത്.